За наводку дзякуй сяброўцы. 😊
Ну вось, я Скарынушка. :D
"Віншуем! Ваш тып — Францыск Скарына.
Беларускі першадрукар быў адукаваным, прадпрымальным, вынаходлівым, смелым чалавекам. Ён вучыўся і працаваў у найбуйнейшых еўрапейскіх гарадах: Кракаве, Падуі, Празе, Вільні, Кёнігсбергу. Быў знаёмы з прадстаўнікамі інтэлектуальнай эліты тагачаснай Еўропы.
23 кнігі Скарынавай Бібліі (а ў дадатак “Малая падарожная кніжыца” і “Апостал”) яскрава сведчаць, што наша Радзіма была адным з культурных цэнтраў эпохі Адраджэння. Скарына стаў вялікім чалавекам, бо здолеў рэалізаваць ідэі, актуальныя для свайго часу, перадвызначыць развіццё еўрапейскай культуры на дзесяцігоддзі і нават стагоддзі. Пры гэтым цалкам магчыма, што цікавасць Скарыны да кнігавыдання тлумачылася не толькі высокімі гуманістычнымі памкненнямі, але і жаданнем палепшыць фінансавае становішча сям'і.
Францішку Лукічу далёка не заўсёды шанцавала ў справах. У 1530 годзе ён пакінуў двор прускага герцага і таемна з’ехаў з Караляўца, прыхапіўшы тамтэйшага друкара, што выклікала незадаволенасць заможных сяброў, якія фундавалі яго дзейнасць. Праз два гады першадрукар быў зняволены за пазыкі свайго брата і некалькі месяцаў правёў у познаньскай турме.
Здаецца, прадстаўнікі духавенства павінны былі б паважаць выдаўца Бібліі. На самой справе ні праваслаўная, ні каталіцкая канфесіі не прымалі выданні Францыска, бо той парушыў прынцып літаральнага перакладу, пераказваў, скарачаў тэкст Бібліі, уводзіў аратарскія прыёмы, фальклорныя вобразы. Некаторыя кнігі Скарыны былі спаленыя на загад маскоўскага князя, бо той лічыў недапушчальным мець на сваіх землях творы, выдадзеныя падданым рымскай, а не візантыйскай царквы. Як вядома, пасля 1525 года Скарына не вяртаўся да кнігавыдання, а займаўся іншымі карыснымі справамі. Ёсць звесткі пра яго працу у пражскім батанічным садзе, заснаваным каралём Фердынандам, але больш верагодна, што Францыск быў медыкам пры двары.
Даследнікі працягваюць знаходзіць новыя факты пра дзейнасць Францыска Скарыны. Таму да 500-годдзя беларускага кнігавыдання выйшла шмат цікавых кніг пра слыннага першадрукара :)"